BANM BİOLAB-la müqavilə imzalayıb

Bakı. 9 dekabr. REPORT.AZ/ Bakı Ali Neft Məktəbində (BANM) Türkiyənin BİOLAB şirkətinin təşəbbüsü ilə “İstifadədə olan yağ analizi ilə avadanlıqların proqnozlaşdırılmış texniki baxım üsulları” adlı seminar keçirilib.

Bu barədə “Report”a Ali Məktəbin İctimaiyyətlə Əlaqələr şöbəsindən məlumat verilib.

Seminarda BANM-in rəhbərliyi, professor-müəllim heyəti və tələbələri, BİOLAB şirkətinin baş icraçı direktoru Sinan Vasfi, şirkətin Azərbaycandakı nümayəndəliyinin rəhbəri Bəxtiyar Məmmədzadə, o cümlədən şirkətin Azərbaycandakı satış menecerı Kənan Atakişiyev, Azərbaycan Respublikası Ekologiya və Təbii Sərvətlər Nazirliyinin, SOCAR-ın müxtəlif idarə və müəssisələrinin, BP-nin və diğər şirkətlərin nümayəndələri iştirak ediblər.

TBANM-in rektoru Elmar Qasımov bu ali təhsil ocağının qısa zamanda əldə etdiyi uğurları, görülən işlər və perspektivlər haqqında məlumat verib.

Rektor, həmçinin BANM-də tələbələr üçün təşkil olunan istehsalat təcrübəsinə verilən xüsusi önəmdən və onları elmi tədqiqatlara cəlb etmək məqsədilə həyata keçirilən tədbirlərdən danışıb. E.Qasımov bildirib ki, bu tədris ilində BANM-ə qəbul olan tələbələrdən 17 nəfəri Prezident təqaüdünə layiq görülüb.

“Tələbələrimzin əldə etdiyi bu uğurlar böyük nailiyyətdir” - deyə, E.Qasımov vurğulayıb. Elmar Qasımov Ali Məktəbin beynəlxalq şirkətlərlə uğurlu əməkdaşlığından da söz açıb.

BİOLAB şirkətinin baş icraçı direktoru Sinan Vasfi təmsil etdiyi şirkət barədə danışaraq bildirib ki, BİOLAB özünün 30 ilik təcrubəsi ilə neft və neft məhsullarının analizləri üçün laboratoriya avadanlıqlarının təmin edilməsi, quraşdırılması, təlimlərin verilməsi və eyni zamanda, servis xidmətini həyata keçirir.

Mərkəzi ofisi Ankarada yerləşən BİOLAB dünyanın bir çox ölkələrində BP, Shell, Exxon, Türpaş və digər qlobal şirkətlərini laboratoriya cihazları ilə təmin edib.

“Şirkətin ən başlıca məqsədlərindən biri yağ analizləri ilə proqnozlaşdırlmış baxım sistemlərini sənaye və elm ocaqlarına müzakirə edərək regiondakı gənclərin maariflənməsinə və sənayenin inkişafına nail olmaqdır” - deyə Sinan Vasfi bildirib.

Tədbir çərçivəsində BANM və BİOLAB şirkəti arasında əməkdaşlıq haqqında razılaşma imzalanıb. Razılaşmaya əsasən, BANM-də “ömürboyu təhsil” konsepsiyası çərçivəsində təşkil edilən stajkeçmə, ixtisasartırma və yenidənhazırlama kurslarında, eləcə də elmi-praktiki seminarlarda və konfranslarda BİOLAB əməkdaşları tərəfindən müxtəlif mövzular üzrə mühazirələrin təqdimatı üçün şərait yaradılacaq. Həmçinin, BANM-in əməkdaşları, tələbələri və BİOLAB şirkətinin əməkdaşları qarşılıqlı olaraq kitabxana-informasiya resurslarından istifadə imkanlarından yararlanacaqlar.

Seminarda o cümlədən, yağ analizinin əhəmiyyəti, sənaye müəssisələri üçün əsas texnikalar və onların faydaları, istifadədə olan yağın keyfiyyəti və istifadə müddətinin monitorinqinin faydaları, avadanlıqların sazlığının monitorinqinin faydaları, istifadədə olan yağların element analizinin əhəmiyyəti və s. barədə məlumat verilib.

Seminar tələbələrlə şirkət nümayəndələrinin sual-cavab sessiyası ilə yekunlaşıb.