Bakı 11° C
https://static.report.az/photo/44bcc138-1913-3c5f-8c79-cfb92fbf317b.jpg
AMEA-nın nun baş elmi işçisi, kimya üzrə elmlər doktoru Ələfsər Bəxtiyar oğlu Məmmədov 69 yaşında dünyasını dəyişib.
"Report" xəbər verir ki, Ələfsər Bəxtiyar oğlu Məmmədov 4 yanvar 1952-ci ildə Şəkidə anadan olub.
1973-cü ildə V.İ.Lenin adına Azərbaycan Pedaqoji İnstitutunun Kimya fakültəsini bitirib. 1973-1977-ci illərdə Azərbaycan SSR EA Qeyri-üzvi və Fiziki Kimya İnstitutunun (indiki Kataliz və Qeyri-üzvi Kimya İnstitutu) əyani aspiranturasında təhsil alıb. Ə.Məmmədov o vaxtdan ömrünün sonuna qədər bu institutda işləyib. 1980-ci ildə kimya üzrə fəlsəfə, 1994-cü ildə isə doktorluq dissertasiyasını müdafiə edib.
Ələfsər Məmmədovun əsas elmi istiqaməti müxtəlif kimyəvi çevrilmələr üçün yeni katalizatorların hazırlanmasından ibarət olub. Onun tərəfindən neft fraksiyalarının və fərdi karbohidrogenlərin vacib neft-kimya məhsullarına (benzin, olefin və s.) kimyəvi çevrilməsi və digər proseslər üçün yeni katalizatorların məqsədyönlü hazırlanmasının və həmin proseslər üçün mövcud katalizatorların təkmilləşdirilməsinin fiziki-kimyəvi əsasları işlənib. Bu elmi əsaslar zəminində krekinq və piroliz prosesləri üçün yüksək aktivliyə və seçiciliyə, ekoloji və iqtisadi baxımdan yüksək səmərəliliyə malik, tərkibində seolit olan katalizatorlar hazırlanıb.
Ə.Məmmədov 125 elmi əsərin və müəlliflik şəhadətnaməsinin, 3 dərslik və 1 fundamental monoqrafiyanın müəllifi olub. Onun rəhbərliyi ilə 3 fəlsəfə doktoru yetişdirilib. Ələfsər Məmmədov AMEA-nın və Bakı Dövlət Universitetinin Fəxri fərmanları ilə təltif edilib.
Alim elmi fəaliyyətlə yanaşı, müxtəlif vaxtlarda pedaqoji fəaliyyətlə də məşğul olub. O, 1998-2002-ci illərdə Azərbaycan Memarlıq və İnşaat Universitetində əvəzçiliklə professor vəzifəsində, eləcə də 2011-ci ildən Heydər Əliyev adına Ali Hərbi Məktəbin Tədris şöbəsində əvəzçiliklə professor vəzifəsində çalışıb.
Ə.Məmmədov müxtəlif vaxtlarda Azərbaycan Respublikasının Prezidenti Yanında Ali Attestasiya Komissiyasının Kimya ixtisası üzrə ekspert komissiyasının, Bakı Dövlət Universitetində fəaliyyət göstərən Dissertasiya Şurasının, Radiasiya Problemləri İnstitutunda Elmi seminarın, Neft-Kimya Prosesləri İnstitutunda Elmi seminarın, Kataliz və Qeyri-üzvi Kimya İnstitutunda Elmi seminarın üzvü olub.
