Tələblərə cavab verməyən daş karxanalarının bağlanması üçün müvafiq orqanlar qarşısında vəsatət qaldırılacaq

Bakı. 26 oktyabr. REPORT.AZ/ "Qoyulan tələblərə cavab verməyən, müasir texnologiyalardan istifadə etməyən daş karxanaları barəsində yaxın vaxtlarda qanunamüvafiq tədbirlər görüləcək, fəaliyyətlərinin dayandırılması üçün müvafiq orqanlar qarşısında vəsatət qaldırılacaq".

"Report" xəbər verir ki, bunu mətbuat konfransında Ekologiya və Təbii Sərvətlər Nazirliyinin (ETSN) Ətraf Mühit üzrə Milli Monitorinq Departamentinin direktoru Ramal Bağırov deyib.

O bildirib ki, paytaxtda havanı bürüyən toz-dumanı lokal xarakterlidir və onun əsas mənbələrindən biri şəhəri əhatə edən daş karxanalarıdır: "Bununla bağlı da Nazirliyə əhali tərəfindən çoxlu sayda şikayətlər daxil olur. Daş karxanalarındakı mövcud vəziyyətlə əlaqədar Nazirlik tərəfindən araşdırmalar aparılıb, istismar sahələrində və ətraf ərazilərdə monitorinqlər keçirilib. Artıq ictimaiyyətə də məlumdur ki, araşdırmaların nəticəsində müəyyən edilib ki, əksər daş karxanalarının fəaliyyəti hüquqi və normativ tələblərə cavab vermir, istismar sahələrində ekoloji norma və qaydalara riayət edilmir. Ətraf mühitə, təbiətə ziyan vurulur, böyük həcmdə toz kütləsinin ətrafa yayılmasına şərait yaradılır. Bu da ətraf ərazilərdə yaşayan sakinlərin, bütövlükdə Bakı əhalisinin sağlamlığına, paytaxtın ekoloji mühitinə olduqca mənfi təsir göstərir. Bütün bunlara səbəb daş karxanalarının elementar normalara əməl etməməsi, istifadə olunan avadanlıqların müasir tələblərə cavab verməməsidir. Karxanaların, demək olar ki, hamısında ötən əsrin 60-ci, 70-ci illərindən qalmış avadanlıq və texnologiyadan istifadə olunur".

R.Bağırov deyib ki, Nazirlik tərəfindən bütün bu pozuntular karxana istismarçılarının diqqətinə çatdırılıb, görüşlərdə karxanalardakı təbiətə və insanlara zərər verən mövcud vəziyyət izah olunub: "Karxana istismarçılarına yeni və müasir tələblərə cavab verən texnologiyalarla işləmələri tövsiyə edilib. Lakin xeyli müddət ötməsinə baxmayaraq, istismarçılardan heç biri bu istiqamətdə addım atmayıb. Nazirlik xeyli vaxtdır ki, səbr göstərib, karxana sahibkarlarının istismar sahələrində müasir tələblərə cavab verən texnologiyalarla fəaliyyətlərini qurmasını gözləyib".