​Azərbaycanda şənbə gününə gözlənilən hava proqnozu açıqlanıb

Bakı. 28 noyabr. REPORT.AZ/ Noyabrın 29-da Azərbaycanda müşahidə olunacaq hava proqnozu açıqlanıb. Ekologiya və Təbii Sərvətlər Nazirliyinin Milli Hidrometeorologiya Departamentinin Hidrometeoroloji Proqnozlar Bürosunun baş hidroloqu Asif Verdiyev "Report"a açıqlamasında deyib ki, Bakıda və Abşeron yarımadasında buludlu hava şəraitinin üstünlük təşkil edəcəyi, əsasən gecə və axşam az yağıntılı olacağı ehtimal olunur. Şimal küləyi əsəcək, havanın temperaturunun gecə 3-5, gündüz 5-8 dərəcə isti olacağı gözlənilir.

Azərbaycanın rayonlarında noyabrın 29-da hava şəraitinin fasilələrlə yağıntılı olacağı, dağlıq və dağətəyi rayonlarda sulu qar, qar yağacağı, tədricən isə zəifləyəcəyi gözlənilir. Şərq küləyi əsəcək, ayrı-ayrı yerlərdə arabir güclənəcək.

Havanın temperaturunun gecə 0-5, gündüz 5-10 dərəcə isti, dağlarda gecə 5-10 dərəcə şaxta, gündüz 2 dərəcə şaxtadan 3 dərəcəyədək isti olacağı gözlənilir.

Atmosfer təzyiqi normadan yüksək 769 mm civə sütunundan 772 mm sütununa qədər yüksələcək.