"Heydər" məscidində Xocalı qurbanları anılıb

Bakı. 24 fevral. REPORT.AZ/ Bakıdakı "Heydər" məscidində Xocalı faciəsinin qurbanlarının xatirəsi yad edilib.

Məscidin axundu Rüfət Qarayev "Report"a bildirib ki, cümə xütbəsinin ikinci hissəsi Xocalı soyqırımında faciəli şəkildə həlak olanlara həsr olunub.

Faciədə dünyasını dəyişənlərin xatirəsi anılıb, ruhlarına dualar olunub. Xütbədə Xocalı hadisəsinin dəhşətindən söz açılıb. Uşaqlara, qadınlara belə rəhm edilmədiyi vurğulanıb. Qeyd olunub ki, Xocalı dünyada bənzəri az olan faciələrdən biridir. Namazda Xocalıda dünyasını dəyişənlərə Allahdan rəhmət dilənilib.