Yuxarı

İsmayıllıda dini maarifləndirmə və milli-mənəvi dəyərlərin təbliği ilə bağlı tədbirlər keçirilib

İslamın sülh, qardaşlıq və sevgi dini olduğu haqqında geniş söhbətlər aparılıb

Bakı. 27 iyul. REPORT.AZ/ İsmayıllı şəhər “Cümə” məscidi dini icması “Gənclərimizin sağlam dini maariflənməsi” layihəsi çərçivəsində “İslamda vəhdət” adlı dəyirmi masa təşkil edib. 

Dini Qurumlarla İş üzrə Dövlət Komitəsinin (DQİDK) mətbuat xidmətindən “Report”a verilən məlumata görə, tədbirə dini icma tərəfindən ekspert qismində Füzuli Hüsiyev dəvət olunub. Milli-mənəvi və dini dəyərlər, İslamdakı vəhdətin önəmi barəsində ətraflı söhbətlər və fikir mübadiləsi aparılıb. Daha sonra çay süfrəsi ətrafında davam etdirilən tədbirdə Şamaxı bölgəsi üzrə şöbənin aparıcı məsləhətçisi Tural İbrahimov iştirak edib. Sonda iştirakçılar bu cür tədbirlərin keçirilməsindən məmnunluq duyduqlarını bildirib, təşkilatçılara təşəkkürlərini çatdırıblar.

Bundan başqa, İsmayıllı rayon Diyallı kənd məscidi dini icmasının “İnanların əxlaq və sevgi yönümündən dini maariflənməsi” layihəsi çərçivəsində Diyallı kəndində “İslam sülh dinidir” adlı dəyirmi masa təşkil olunub. Tədbirdə Diyallı kənd məscidi dini icmasının üzvləri, İsmayıllı şəhər “Cümə” məscidi dini icmasının sədri Vasif Teymurov, ətraf kəndlərin imam və dini icma sədrləri, gənclər, o cümlədən Şamaxı bölgəsi üzrə şöbənin aparıcı məsləhətçisi Tural İbrahimov da iştirak edib.

Dəyirmi masada milli-mənəvi və dini dəyərlər, İslamın sülh, qardaşlıq və sevgi dini olduğu haqqında geniş söhbətlər aparılıb. Sonda ağsaqqallar, gənclər, habelə dini icma üzvləri bu formatda tədbirlərin keçirilməsinin əhəmiyyətindən danışıblar.

Qeyd edək ki, Prezident İlham Əliyevin 27 noyabr 2014-cü ildə imzaladığı sərəncama əsasən, ölkədə dini maarifləndirmə və milli-mənəvi dəyərlərin təbliği işini daha da gücləndirmək məqsədi ilə dini icmalara maliyyə yardımı göstərmək üçün Azərbaycan Respublikasının 2014-cü il dövlət büdcəsində nəzərdə tutulmuş Prezidentin Ehtiyat Fondundan DQİDK-ya 2,5 milyon manat vəsait ayrılıb. Həmin maliyyə vəsaiti hesabına maarifləndirmə işinin aparılması məqsədilə Dövlət Komitəsinin dəstəyi ilə tədbirlər təşkil edilir.

Mətndə orfoqrafik səhv aşkar etdinizsə, səhv olan hissəni qeyd edib Ctrl + Enter düymələrini sıxın.

Xəbər lenti

Bütün xəbərlər


Orphus sistemi