Vyetnamda “Omikron” ştamına ilk yoluxma qeydə alınıb

Vyetnamda koronavirusun “Omikron” ştamına ilk yoluxma hadisəsi qeydə alınıb.

“Report” xarici KİV-ə istinadən xəbər verir ki, bu barədə ölkənin səhiyyə nazirinin müavini Nquyen Tronq Son açıqlama verib.

O deyib ki, dekabrın 19-da Böyük Britaniyadan təyyarə ilə paytaxt Hanoydakı “Noi Bai” Beynəlxalq Hava Limanına gəlmiş sərnişindən götürülən koronavirus testi müsbət çıxdıqdan sonra o, karantinə alınıb və yerli hərbi xəstəxanaya yerləşdirilib.

Dekabrın 20-21-də aparılan genetik təhlillər həmin şəxsin B.1.1.529, yəni “Omikron” ştamına yoluxduğunu təsdiqləyib.