Vens: ABŞ-nin İranla münaqişəsi əbədi müharibə olmayacaq

ABŞ-nin vitse-prezidenti Cey Di Vens bildirib ki, İranla silahlı münaqişə Birləşmiş Ştatların növbəti "əbədi müharibəsinə" çevrilməyəcək.

"Report" xəbər verir ki, o, bu barədə Ağ Evdə mətbuat konfransında İrana qarşı hərbi əməliyyatların müddəti ilə bağlı suala cavabında deyib.

"Bu, əbədi davam edən bir şey olmayacaq", - Vens vurğulayıb. Onun sözlərinə görə, 11 həftəlik münaqişənin əhəmiyyətli hissəsi atəşkəs rejiminə keçib.

"Bu, əbədi müharibə deyil. Biz bunu edəcəyik və evə qayıdacağıq. Bunu ABŞ Prezidenti Donald Tramp vəd edib. Bunu məhz o edəcək", - vitse-prezident deyib.

Bununla yanaşı, Vens etiraf edib ki, bir çox amerikalılar, xüsusən onun nəslinin nümayəndələri xaricdəki uzun sürən hərbi münaqişələrdən narahatdırlar.