Syerra-Leonedə sürüşmə nəticəsində ölənlərin sayı 461 nəfərə çatıb

Bakı. 18 avqust. REPORT.AZ/ Syerra-Leonenin paytaxtı Fritaun şəhərində sürüşmə nəticəsində ölənlərin sayı 461 nəfərə çatıb.

"Report"un məlumatına görə, bu barədə "Reuters" yerli məmura istinadən xəbər verib.

Xəbərdə bildirilir ki, onlardan 156-ı uşaqlardır. Adı çəkilməyən məmurun sözlərinə görə, ölənlərin çoxu dəfn edilib. Lakin cəsədlərin morqa aparılması hələ davam edir.

Syerra-Leonedə leysan yağışlar avqustun 14-də sürüşmələrə səbəb olub. Nəticədə paytaxt Fritaunda 400-dən çox insan ölüb. İtkin düşənlərin sayı 600 nəfərdir. Xilasetmə işləri davam edir.

Təbii hadisə zamanı 1000-dən çox sakin evini tərk edə bilməyib. Beynəlxalq Qırmızı Xaç Komitəsinin məlumatına görə, sürüşmə ilə əlaqədar 3000-ə yaxın insan evini itirərək küçədə qala bilər.