Rəcəb Tayyib Ərdoğan: "BMT Təhlükəsizlik Şurası 20 daimi üzvdən ibarət olmalıdır"

Bakı. 24 sentyabr. REPORT.AZ/ Türkiyə Prezidenti Rəcəb Tayyib Ərdoğan yenidən BMT Təhlükəsizlik Şurasında köklü islahatlar aparılmasının zəruriliyini və təşkilatın cari vəziyyətdə qlobal məsələləri həlli etmək iqtidarında olmadığını vurğulayıb.

"Report" TASS-a istinadən xəbər verir ki, o, bu barədə BMT Baş Assambleyasında iştirak etmək üçün getdiyi ABŞ-ın Nyu-York şəhərində türk və müsəlman icmaları qarşısında çıxışı zamanı bildirib.

"194 ölkədən 5-i bütün dünyanı mühakimə edə bilməz, BMT Təhlükəsizlik Şurasının üzvləri daimi və qeyri-daimi kimi bölünməməlidir. İslahatlar aparılsa, 20 daimi üzv, bütün qitələrin və dinlərin nümayəndələri olacaq, rotasiya olacaq. Yalnız bu halda BMT ədalətli addımlar aa biləcək", - Türkiyə Prezidenti deyib.

Türkiyə lideri təşkilatın hazırda mövcud münaqişələri nizamlanmaq iqtidarında olmadığını bildirib. Onun sözlərinə görə, BMT bu günə qədər nə Suriya böhranını, nə də Fələstin problemini həll edə bilməyib. 

R.T.Ərdoğan əlavə edib ki, Fələstin probleminin həll olunmaması İsrailin qanunları rədd etməsindən çox, müsəlmanlar arasında birliyin olmaması ilə bağlıdır.