Qvineyada yanacaq anbarının partlaması nəticəsində ölənlərin sayı 18-ə çatıb

Qvineyanın paytaxtı Konakri şəhərinin mərkəzində yanacaq anbarında baş verən güclü partlayış nəticəsində ölənlərin sayı 18 nəfərə çatıb.

“Report” xəbər verir ki, bu barədə hökumətin yaydığı məlumatda deyilir.

Qeyd olunub ki, tibb mütəxəssislərinin göstərdiyi səylərə baxmayaraq, daha dörd ölüm hadisəsi baş verib. Nəticədə ölənlərin sayı 18-ə çatıb.

Partlayış hökumət binalarının yerləşdiyi Kalum rayonunda baş verib. Bildirilib ki, hadisənin səbəbini müəyyən etmək və günahkarları məsuliyyətə cəlb etmək üçün araşdırma aparılacaq.

Terminala dəymiş ziyanın həcmi hələlik bəlli deyil.