Monteneqroda hoteldə 100-ə yaxın turist zəhərlənib

Monteneqronun "turizm paytaxtı" Budva şəhərindəki hoteldə kütləvi qida zəhərlənməsi qeydə alınıb.

"Report" xəbər verir ki, bu barədə ölkənin milli televiziyası RTCG məlumat yayıb.

Məlumata görə, 96 əcnəbi turist yaşadıqları hoteldə qidadan zəhərlənib.

Bildirilir ki, Polşa, İtaliya və Xorvatiyadan olan turistlər Çetinye, Bar və Kotor şəhərlərindəki xəstəxanalarına müraciət ediblər. Xəstələrdən otuzunda kəskin ishal sindromu və qusma qeydə alınıb.

Podqoritsadakı xarici səfirliklər və müvafiq nazirlik öz həmvətənlərinə yardıma qoşulub.

Ölkə televiziyası qeyd edir ki, bundan əvvəl zəhərlənmənin baş verdiyi hoteldə dəfələrlə sanitar normaların pozulması müşahidə edilib.