İsrail ordusu yanvar ayında İordan çayının qərb sahilində 55 silahlı radikalı məhv edib

İsrail təhlükəsizlik qüvvələri 2025-ci ilin yanvarında İordan çayının qərb sahilində 55 silahlı fələstinlini öldürüb və 380 şübhəlini saxlayıb.

“Report” xəbər verir ki, bu barədə İsrail Müdafiə Qüvvələrinin (IDF) mətbuat xidməti məlumat yayıb.

“Hazırda [İordan çayının qərb sahilində] üç ərazidə - Cenin, Tulkərm və şimal Samariyada antiterror əməliyyatı davam edir”, – məlumatda bildirilib.

İdarənin məlumatına görə, son günlər qoşunlar çoxsaylı silah-sursat, o cümlədən tüfəng, tapança və müxtəlif partlayıcı maddələr aşkar ediblər.

IDF qeyd edib ki, İsrail təhlükəsizlik qüvvələri İsrail vətəndaşlarının təhlükəsizliyini təmin etməklə yanaşı, bütün “Yudeya və Samariya” boyu antiterror əməliyyatlarını davam etdirəcək.