Fransada helikopter qəzaya uğrayıb, 3 xilasedici həlak olub

Fransanın cənub-şərqində daşqınların vurduğu ziyanın aradan qaldırılması ilə məşğul olan üç xilasedici Mülki Təhlükəsizlik Qüvvələrinin helikopterinin qəzaya uğraması nəticəsində həlak olub.

"Report" TASS-a istinadən xəbər verir ki, bu barədə ölkənin Daxili İşlər Nazirliyinin yaydığı bəyanatda deyilir.

Bildirilir ki, helikopterlə rabitə dünəndən - hava nəqliyyatı vasitəsinin axtarış-xilasetmə əməliyyatını başa çatdırmaq üçün Var departamentində yerləşən aeroporta uçduğu zaman kəsilmişdi. Hadisənin başvermə səbəbləri hələlik bəlli deyil, araşdırma aparılır.

Qeyd edək ki, bu gün Fransada ölkənin cənub-şərqində baş verən güclü daşqınlar səbəbilə tətbiq olunan hava şəraiti təhlükəsinin "qırmızı" səviyyəsi ləğv edilib.