Çində məktəb tavanı uçub, 9 nəfər ölüb

Çinin şimal-şərqindəki Heyluntszyan əyalətinin Ciciqar şəhərində orta məktəbin ərazisində idman korpusunun tavanının uçması 9 nəfərin ölümünə səbəb olub, daha ikisi dağıntılar altındadır.

“Report” xəbər verir ki, bu barədə Çin Mərkəzi Televiziyası məlumat yayıb.

Daha əvvəl telekanal məlumat verib ki, bazar günü Pekin vaxtı ilə saat 16:00-da (Bakı vaxtı ilə 12:00) şəhərin təhsil müəssisələrindən birində tavan uçub. Nəticədə azı 10 nəfər dağıntılar altında qalıb.

Daha iki nəfərin hələ də itkin düşdüyü bildirilir. Axtarış-xilasetmə əməliyyatı davam etdirilir.

İstintaqın ilkin məlumatlarına görə, təmir işlərinin aparılması qaydalarının pozulması səbəbindən idman binasının dam örtüyü zədələnib. Sonradan yağan yağışlar onun dağılmasına yol açıb.