Çin lideri dünya iqtisadiyyatındakı böhranın səbəbləri barədə danışıb

“Dünya iqtisadiyyatı böhrandan çıxmaq üzrədir, lakin bir çox maneələrlə üzləşir, inflyasiya riskləri meydana gəlir, istehsal zəncirləri isə xaotikdir”.

“Report” xarici mətbuata istinadən xəbər verir ki, bunu Çin Xalq Respublikasının sədri Si Szinpin Dünya İqtisadi Forumunun təşkil etdiyi “Davos gündəliyi” virtual müzakirələr çərçivəsində bildirib.

Onun sözlərinə görə, enerji daşıyıcılarının çatışmazlığı riskləri mövcuddur, iqtisadiyyatın bərpa prosesindəki qeyri-müəyyənlik isə güclənir. Bununla belə, əsas məhsulların qiyməti artmaqda davam edir.

Çin lideri mürəkkəb inflyasiya risklərinin meydana gəldiyini, bununla belə, Çin rəhbərliyinin ölkənin iqtisadi inkişaf perspektivlərinə tam əmin olduğunu qeyd edib.

“Çinin ümumi iqtisadi inkişaf tendensiyası yaxşıdır. Ötən il ÜDM təxminən 8% təşkil edib. Nisbətən yüksək artım göstəriciləri və aşağı inflyasiya ilə bağlı məqsədimizin iki qatına nail olmuşuq”, - Si Szinpin deyib.