Banqkokda barda baş verən yanğın zamanı azı 27 nəfər həlak olub

Tailandın paytaxtı Banqkokun barlarının birində baş verən yanğın nəticəsində azı 27 nəfər həlak olub.

"Report" yerli mediaya istinadən xəbər verir ki, bunu Tailandın Baş naziri Anutin Çarnvirakul deyib.

Onun sözlərinə görə, həlak olan 27 nəfərin meyiti artıq tapılıb, daha bir neçə nəfər xəstəxanaya yerləşdirilib. Yanğının səbəbləri müəyyənləşdirilir.

İlkin versiyaya görə, yanğın qısaqapanmadan sonra baş verib. Şahidlər bildirirlər ki, yanğın başlayandan sonra partlayış baş verib, məkanı isə çox sürətlə tüstü və alov bürüyüb.

Yanğınsöndürənlər təxminən yarım saat ərzində alovu lokallaşdıra biliblər, bir neçə nəfər hələ də itkin düşmüş hesab olunur.