Argentina polisi yenə etirazçılara qarşı qaz tətbiq edib

Argentina polisi yola çıxmaq istəyən hökumət əleyhinə etirazçılara gözyaşardıcı qazdan istifadə edib.

Bu barədə “Report” TASS-a istinadən xəbər verir.

Prezident Xavyer Mileyin islahat paketinə qarşı nümayiş bir qrup etirazçının yol hissəsinə keçməyə cəhd etməsinə qədər sakit şəkildə davam edirdi. Qazdan istifadə edildikdən sonra 100-dən çox adamın daxil olduğu etirazçılar səkiyə qayıdıblar.

Bu, Buenos-Ayresdə hökumətin hazırladığı islahat qanun layihəsinin müzakirə olunduğu Konqres binası qarşısında etirazların üçüncü günüdür. Cümə günü sənəd bütövlükdə Deputatlar Palatasında səs çoxluğu ilə təsdiqlənib, gələn həftə ayrı-ayrı maddələr üzrə səsvermənin keçirilməsi gözlənilir. Daha sonra sənəd Senata göndəriləcək.

Xatırladaq ki, etirazçılarla hüquq-mühafizə orqanları əməkdaşları arasında ən şiddətli toqquşma fevralın 1-də baş verib. Polis və jandarm nümayişçilərə qarşı rezin güllə, bibər qazı, şırnaqlı su və dəyənəklərdən istifadə edib.