Almaniyanın yeni müdafiə nazirinin andiçməsi olub

Anneqret Kramp-Karrenbauer Almaniya Bundestaqının növbədənkənar iclasında ölkənin müdafiə naziri kimi and içib.

Bu barədə "Report" RİA "Novosti"yə istinadən xəbər verir.

Andiçmədən dərhal sonra Kramp-Karrenbauer "Almaniyanın gələcəyi üçün məsuliyyət. Dəyişən dünyada güclü bir Bundesver naminə" mövzusunda hökumət bəyanatı verib. O, çıxışı zamanı həmçinin Bundesverdə ekstremizmə yer olmadığını qeyd edib.

Almaniya KİV-nin məlumatına görə, 709 deputat yay tətilindən Berlindəki xüsusi iclasa çağrılıb.

Xatırladaq ki, A.Kramp-Karrenbauerin bu vəzifəyə təyin olunmasına dair qərar keçən həftə qəbul edilib. O, bu vəzifədə Avropa Komissiyasının sədri seçilən Ursula fon der Lyayeni əvəzləyəcək.