Almaniyada etirazçılar Yunanıstandakı qaçqınları ölkələrinə çağırırlar

Almaniyanın paytaxt Berlin də daxil olmaqla Köln, Hamburq, Frankfurt kimi böyük şəhərlərdə Yunanıstanda köməksiz vəziyyətdə qalan qaçqınlar üçün dəstək aksiyası keçirilib. 
“Report”un Avropa bürosunun məlumatına görə, aksiya iştirakçıları şəhərlərin mərkəzi küçələri ilə yürüş edərək, ötən gün Yunanıstanın Midilli adasında yerləşən “Moria” qaçqın kampında baş verən yanğın nəticəsində köməksiz vəziyyətdə qalan insanların təcili olaraq Almaniya və digər Avropa ölkələrinə gətirilmələrini tələb ediblər. 
Avropada fəaliyyət göstərən müxtəlif insan haqları təşkilatçılarının üzvlərinin də qatıldığı aksiyada “Moriadan Alamaniyaya gətirin!”, “Yerimiz var”, “Sərhədlərə yox” və “Deportasiyaları dayandırın” kimi şüarlar səsləndirilib.
Digər tərəfdən, Almaniyanın Şimali Reyn Vestfaliya əyalətinin baş naziri Armin Laşet yerli mətubata açıqlamasında bildirib ki, rəhbərlik etdiyi əyalət “Moria”dakı kampdan 1 000 qaçqının gətirilərək şəhərlərdəki yataqxanalara yerləşdirilməsi üçün danışıqlara başlayıb. 
Laşet bildirib ki, artıq Midilli adasındakı kampdan valideyn himayəsindən məhrum olan uşaqların ilk qrupu Almaniyaya gətirilib.
Xatırldaq ki, ötən gün Yunanıstanın Midilli adasında yerləşən və 13 minə yaxın sığınacaq axtaranın qaldığı kampda ard-arda yanğın baş verib. Avropanın ən böyük kampı olan “Moria”da keçən həftədən 35 nəfərdə koronavirusun tapılması ilə sərt karantin rejimi tətbiq edilirdi. Bəzi iddialara görə, sığınacaq axtaranlar sərət karantin rejiminə etiraz olaraq kampı bilərəkdən yandırıb. Yunanıstan Daxili İşlər Nazirliyi iddiaların araşdırılması üçün xüsusi qrupun hadisə yerində işlədiyini açıqlayıb.