ABŞ Kubaya 178 milyard dollar zərər vurub

Ötən ilin martından bu ilin fevralınadək ABŞ-nin ticari-iqtisadi və maliyyə blokadasının Kubaya vurduğu ziyan 8,83 milyard dolları ötüb.

"Report" xəbər verir ki, bu barədə Kubanın xarici işlər naziri Bruno Eduardo Rodriqes Parrilya mətbuat konfransında bildirib.

Onun sözlərinə görə, hazırkı göstərici əvvəlki hesabatdakı göstəricidən 7% çoxdur. Blokadanın 60 ildən artıq müddətdə yaratdığı ümumi zərər cari qiymətlərlə 178,7 milyard dolları ötür ki, bu da əvvəlki hesabatda göstərilən rəqəmdən 4,7 % çoxdur.

Nazir bildirib ki, hesabat BMT Baş Assambleyasının müzakirəsinə çıxarılacaq.

ABŞ-nin Kubaya tətbiq etdiyi blokadanın ləğv edilməsinin zəruriliyi haqqında qətnamə üzrə növbəti səsvermə oktyabrın 27–28-də Nyu-Yorkda keçiriləcək.