Bakı. 30 mart. REPORT.AZ/ ABŞ Dövlət Departamentinin gizli informasiyalara çıxışı olan xanım əməkdaşına Çin kəşfiyyatının agentləri ilə əlaqələrinin olmasını gizlətdiyinə görə ittiham irəli sürülüb.
"Report" xəbər verir ki, bu barədə ABŞ Ədliyyə Nazirliyindən məlumat veriblər.
İddianamədə 60 yaşlı Kendis-Mari Kleybornun hədiyyələr qismində on minlərlə dollar aldığı göstərilib.
O, rəsmi icraata mane olmaqda və FTB-yə yalan məlumatlar verməkdə ittiham olunur.
Kleyborn özünü günahkar saymadığını bildirib.
Qeyd edək ki, Kleyborn Dövlət Departamentində 1999-cu ildən işləyir. O İraq, Sudan və Çin də daxil olmaqla, bir sıra xarici diplomatik missiyalarda çalışıb.