ABŞ-də meşədə yanğın törətməkdə şübhəli bilinən şəxs həbs edilib

Polis əməkdaşları ABŞ-nin Vaşinqton ştatının Spokan dairəsində baş vermiş meşə yanğınlarından biri ilə əlaqədar bir nəfəri qəsdən yanğın törətmək ittihamı ilə həbs ediblər.

"Report" CNN telekanalına istinadən xəbər verir ki, bu barədə Vaşinqton ştatının qubernatoru Bob Ferqyuson məlumat verib.

Hadisə ilə bağlı araşdırma aparılır.

Ümumilikdə Spokan dairəsində baş verən üç böyük yanğın səbəbindən təxminən 65 min nəfər təxliyə edilib. Zərərçəkənlər və ya ölənlər barədə məlumat hələ ki, təsdiqlənməyib.

Yanğınlar nəticəsində 700-dən çox tikili məhv olub, Vaşinqton ştatında 260 min akrdan çox torpaq sahəsi yanıb.