Azərbaycanın Qırğızstandaki səfiri bu ölkədə yaşayan azərbaycanlılarla görüşüb

Bakı. 19 aprel. REPORT.AZ/ Azərbaycanın Qırğızıstandaki səfiri Hidayət Orucov Qırğızstanda yaşayan azərbaycanlılarla görüşüb.

"Report" xəbər verir ki, tədbir Qırğız Xalqı Assambleyasının iclas salonunda keçirilib.

Görüşü açan “Azəri” İctimai Birliyinin sədri Əzizağa Əliyev Prezident İlham Əliyevin rəhbərliyi ilə Azərbaycanın sürətli inkişafından qürur duyduqlarını bildirib, səfir H.Orucovun Prezidentin siyasətini ardıcıl yerinə yetirərək diaspora nümayəndələrinə diqqət və qayğı göstərdiyini qeyd edib.

Ə.Əliyev sayının az olmasına baxmayaraq, ancaq fəaliyyətləri yetərincə hiss olunan erməni diasporasının qondarma “erməni soyqırımı” ilə bağlı təbliğat işlərinin aparmasına yol verməməsinin vacibliyini və bunun hər bir azərbaycanlının borcu olduğunu xüsusilə vurğulayıb.

Sonra çıxış edən səfir Hidayət Orucov qeyd edib ki, dünya azərbaycanlılarının birliyi, soydaşlarımızın həmrəyliyi ideyası və bu ideyanın gerçəkləşməsi üçün müvafiq tədbirlərin həyata keçirilməsi məhz Ümummilli lider Heydər Əliyevin xalqımız və Vətənimiz qarşısında göstərdiyi tarixi xidmətlərindən biridir.

Onu da qeyd edib ki, ölkəmiz hələ də müharibə şəraitindədir, ərazimizin 20 faizi Ermənistan tərəfindən işğal olunub, bir milyondan artıq yurddaşımız isə qaçqınlıq həyatı yaşamağa vadar edilib.

Səfir görüşdə qaldırılan konkret məsələlərdən söz açaraq, bunlarla bağlı müvafiq olaraq tədbirlərin görüləcəyini, Azərbaycanın və Qırğızstanın müvafiq dövlət qurumları ilə iş aparılacağınısöyləmiş, diaspora üzvlərinin də bu istiqamətdə Səfirlik ilə birlikdə fəaliyyət göstərməsinin vacibliyini qeyd edib.