Xankəndidəki "Qış nağılı" yarmarkasında bir çox şirkət və müəssisələr öz məhsullarını nümayiş etdirirlər

Xankəndidə Yeni il münasibətilə yarmarka təşkil olunub.

Bunu “Report”un Xankəndiyə ezam edilmiş əməkdaşına açıqlamasında Xankəndi şəhərində, Ağdərə və Xocalı rayonlarında Bərpa, Tikinti və İdarəetmə xidmətinin İctimaiyyətlə əlaqələr şöbəsinin müdiri Afət Telmanqızı deyib.

O, Xankəndidə uzun müddətdən sonra ilk dəfə bayram yarmarkası təşkil olunduğunu vurğulayıb:

“Yarmarka Dünya Azərbaycanlılarının Həmrəyliyi Günü və Yeni il münasibətilə təşkil edilib. "Qış nağılı" adlı yarmarkada bir çox şirkət və müəssisələr, həmçinin fərdi şəxslər təmsil olunur, öz məhsullarını nümayiş etdirirlər.

Çox əlamətdardır ki, biz uzun illər işğal altında olan və artıq azad edilən doğma Xankəndidə belə tədbirləri keçirir, bu sevinci yaşayırıq. Xalqımız uzun illərdir, səbirsizliklə gözlədiyi bu günü böyük coşqu ilə qarşılayır”.

A.Telmanqızı Xankəndidə keçirilən bayram tədbirlərinin bir neçə gün davam edəcəyini bildirib:

“Yarmarka yanvarın 4-nə qədər davam edəcək. Onu da qeyd edim ki, bayram tədbiri bununla yekunlaşmır. Xankəndidə dekabrın 28-də bayram konserti, dekabrın 31-də isə atəşfəşanlıq olacaq”.