Azərbaycan və Misir prezidentlərinin siyasəti iki ölkə arasında yüksək əməkdaşlığın qurulmasına zəmin yaradır

Azərbaycan və Misir arasında dostluq münasibətləri, iki ölkənin prezidentlərinin siyasəti bütün sahələrdə əməkdaşlığın ən yüksək səviyyədə qurulması üçün etibarlı zəmin yaradır.

"Report" xəbər verir ki, bu fikri Dini Qurumlarla İş üzrə Dövlət Komitəsinin sədri Ramin Məmmədov Misirin Dini işlər və vəqflər naziri Usama Əl-Əzhəri ilə görüş zamanı deyib.

Görüşdə Azərbaycandakı dövlət-din münasibətləri, multikultural mühit haqqında danışan Ramin Məmmədov Prezident İlham Əliyevin rəhbərliyi altında bu sahədə həyata keçirilən genişmiqyaslı tədbirlər, milli-mənəvi dəyərlərin qorunması, dini etiqad azadlığının təmin olunması istiqamətində görülən işlərə toxunub.

R. Məmmədov Azərbaycanın Birinci vitse-prezidenti, Heydər Əliyev Fondunun Prezidenti Mehriban xanım Əliyevanın təşəbbüslərinin mədəniyyətlərarası və dinlərarası dialoqun təşviqinə böyük töhfələr verdiyini vurğulayıb. Sədr misirli həmkarına müvafiq qurumların, habelə Komitənin tabeliyində fəaliyyət göstərən Azərbaycan İlahiyyat İnstitutu ilə Misirin dini təhsil ocaqları arasında əməkdaşlığın genişləndirilməsinin zəruriliyi haqqında danışıb.

Misirin Dini işlər və vəqflər naziri Usama Əl-Əzhəri Azərbaycanın mənəvi birliyə, birgəyaşayışa, dünyada sülh və anlaşmaya nail olunmasına xidmət edən təşəbbüslərinin İslam aləmində yüksək dəyərləndirildiyini bildirib. O, həmçinin qarşılıqlı faydalı əməkdaşlığın inkişaf perspektivlərinə toxunan nazir ölkəmizin müvafiq sahədə fəaliyyət göstərən qurumları arasında əlaqələrin daha da güclənməsi üçün yaxşı imkanların mövcud olduğunu deyib.

Dövlət Komitəsi sədrinin Ümumdünya Fətva Evlərinin Baş katibi İbrahim Nəcm ilə görüşündə isə bütün sahələrdə olduğu kimi, dini-mənəvi sahədə də iki ölkə arasında əməkdaşlığın uğurla davam etdirildiyi vurğulanıb. Beynəlxalq tədbirlərdə fəal tərəfdaşlığın bu əməkdaşlığı daha da gücləndirdiyi qeyd olunub. Azərbaycanın dinlərarası dialoqa, İslam həmrəyliyinə, eyni zamanda islamofobiya ilə mübarizəyə mühüm töhfələr verdiyi bildirilib. Azərbaycanın evsahibliyi edəcəyi COP29 çərçivəsində dünya dini liderlərinin zirvə görüşünün keçirilməsinin, qloballaşan dünyanın müasir çağırışlarının nüfuzlu din xadimlərinin iştirakı ilə birgə müzakirəsinin xüsusi əhəmiyyət kəsb etdiyi vurğulanıb.