Bakı 22° C
https://static.report.az/photo/d6dd670c-3fce-302e-8d79-38bf6ada6cbd.jpg
"Amerika Birləşmiş Ştatlarının prezidenti Co Baydenin "erməni soyqırımı" ifadəsini işlətməsi tarixi bir səhvdir. O, bu bəyanatla ədalətin, haqqın deyil, saxtakarlığın və qərəzin yanında olduğunu, onun müdafiəçisi olduğunu nümayiş etdirdi".
Bu sözləri "Report"a açıqlamasında Milli Məclisin deputatı, Ana Vətən Partiyasının sədri Fəzail Ağamalı deyib.
Onun sözlərinə görə, qondarma "erməni soyqırımı" zaman-zaman anti-türk dairələrinin əlində Türkiyəyə qarşı təzyiq və təhdid vasitəsi olub: "Təəssüf ki, bu, indi də davam etməkdədir. Keçən yüzilliyin 60-cı illərində düşünülmüş şəkildə sovet imperiyasının Türkiyəyə qarşı start verdiyi ideoloji və siyasi təzyiq vasitəsi kimi bu avantürist anlayış son illər qərb dövlətlərinin, o cümlədən ABŞ-ın əlində Türkiyəyə qarşı təzyiq vasitəsindən başqa bir şey deyil".
Partiya sədri bildirib ki, Bayden bu ifadəni işlətməklə öz avtobioqrafiyasına daha bir ləkəni vurmuş oldu: "Bəlli olduğu kimi o, Azərbaycana qarşı keçən əsrin 90-cı illərin əvvəllərində 907-ci düzəlişin müəlliflərindən biridir. Tam əminəm ki, bu və buna bənzər sərsəm ifadələr zərrə qədər qardaş Türkiyənin siyasi xəttinə və beynəlxalq nüfuzuna təsir göstərməyəcək. Azərbaycan da hər zaman öz qardaşının yanındadır və yanında olacaq".
Milli Cəbhə Partiyasının sədri, deputat Razi Nurullayev isə "Report"a açıqlamasında ABŞ prezidentinin bəyanatını haqsız kimi qiymətləndirib: "Bu günə qədər onlarla şəxs ABŞ prezidenti olub. Onlara da erməni lobbisi tərəfindən təzyiqlər göstərilib. Ancaq onların heç biri Co Baydenin etdiyini etməyib. Onun bu addımı atması ABŞ üçün heç də yaxşı nəsə vəd etmir. Çünki artıq dünya ABŞ-ın bu kimi məsələlərdə ikili standartlar yeritdiyini görməyə başlayıb. Bu həm də onun göstəricisidir ki, ABŞ öz tərəfdaşlarına qarşı doğru, dürüst addımlar atmır. O, bu addımları atmaqla etibarlılığını itirir".
R.Nurullayev qeyd edib ki, bundan sonra Azərbaycan, Türkiyə və digər ölkələr də ABŞ-a etibar etməyəcəklər: "ABŞ prezidentinin bu addımı atması onun regiondakı öz mövqeyini də zəiflədəcək. Bu gün dünyada gedən proseslər ABŞ-ın super güc olmasına da dəlalət etmir. Çox təəssüf edirəm ki, ABŞ prezidenti belə bir addımı atdı. Bu ifadədən sonra ABŞ-Azərbaycan və ABŞ-Türkiyə münasibətləri pisləşəcək. Biz bunu istəməzdik. Ancaq onlar bunu istədisə biz nə edə bilərik".
Vəhdət Partiyasının sədri, Milli Məclisin deputatı Tahir Kərimli "Report"a açıqlamasında bildirib ki, ABŞ prezidentinin bəyanatını kəskin şəkildə pisləyir: "Azərbaycandakı siyasi partiyalar bununla bağlı birgə bəyanat da qəbul edib. ABŞ prezidentinin bu bəyanatı heç bir hüquqi nəticə törədə bilməz. Bu, popülizmdir. Ən əsası isə xristian həmrəyliyinin bir əlamətidir. Ona görə biz həmişəkindən də çox milli birliyimizi türk və müsəlman dövlətləri ilə birlikdə qorumalıyıq. ABŞ alimləri müəyyən etmişdilər ki, ermənilər iki milyondan artıq türk və müsəlmanları öldürüblər".
Partiya sədri qeyd edib ki, dəfələrlə Türkiyə rəhbərliyi deyib ki, bu məsələ ilə bağlı arxivləri açaq, dövlət komissiyası yaradaq: "Ancaq hər dəfə erməni tərəfi bundan qaçıb. Onun havadarları da eyni münasibətdədir. Hesab edirəm ki, biz Türkiyə və Azərbaycan qardaşlığını daha da artırmalıyıq. ABŞ çox böyük səhv edib. Bu bəyanatla Türkiyə və Azərbaycanla düşmənçiliyi artıran bir hərəkət edib. Yalançı "soyqırımı" ifadəsinin əsası yoxdur".
