Zakir Nuriyev: "İqlim riskləri bank əməliyyatlarına inteqrasiya ediləcək"

Azərbaycanda iqlim risklərinin bank əməliyyatlarına inteqrasiya edilməsi nəzərdə tutulur.

"Report" xəbər verir ki, bunu "Azərbaycan Banklar Assosiasiyası" (ABA) İctimai Birliyinin prezidenti Zakir Nuriyev noyabrın 11-dən başlayaraq noyabrın 22-nə qədər Bakıda keçiriləcək BMT-nin İqlim Dəyişikliyi üzrə Çərçivə Konvensiyasının Tərəflər Konfransının 29-cu sessiyası (COP29) çərçivəsində təşkil olunmuş "Qlobal maliyyə sistemi: İqlim fəaliyyəti üçün maliyyələşmənin genişləndirilməsi" adlı tədbirdə bildirib.

"Biz iqlimlə bağlı riskləri və imkanları risklərin idarə edilməsi çərçivələrimizə, kreditləşmə qərarlarımıza və strateji planlaşdırmamıza daxil edəcəyik. Biz bank fəaliyyətinin həm milli, həm də qlobal ekoloji məqsədlərə töhfə verərkən uzunmüddətli sabitliyə kömək edəcəyinə söz veririk", - deyə o qeyd edib.

Bundan başqa, ABA rəhbərinin sözlərinə görə, yaşıl və davamlı bankçılıq təşviq ediləcək: "Bu istiqamətdə biz Azərbaycanda aşağı karbona davamlı iqtisadiyyata töhfə verən yaşıl layihələrə və davamlı maliyyə təşəbbüslərinə dəstəyi artıracağıq. Buraya yaşıl kreditlərin, davamlılıqla əlaqəli kreditlərin, eləcə də ekoloji cəhətdən məsuliyyətli biznes təcrübəsini təşviq etmək üçün təmiz investisiya imkanları kimi bank məhsullarının hazırlanması və təklif edilməsi daxildir".