"Azərbaycan Sement İstehsalçıları Assosiasiyası"nın Xalis Sıfır Yol Xəritəsi COP29-da təqdim olunub

"Azərbaycan Sement İstehsalçıları Assosiasiyası" İctimai Birliyi ölkənin sement və beton sektorunun Xalis Sıfır Yol Xəritəsini Bakıda keçirilən BMT-nin İqlim Dəyişikliyi üzrə Tərəflər Konfrasının 29-cu sessiyasında (COP29) təqdim edib. Bununla da, Assosiasiyanın üzvləri inşaat sektorunda karbon emissiyalarının azaldılmasını sürətləndirmək cəhdlərini qlobal arenada da nümayiş etdiriblər.

Layihənin təqdimatında Assosiasiyanın direktoru İsrail Asəliyev, "Qlobal Sement və Beton Assosiasiyası"nın (GCCA) CEO-su Tomas Giyo, VDZ Elmi-Tədqiqat İnstitunun CEO-su və "Avropa Sement Tədqiqatları Akademiyası"nın nümayəndəsi Martin Şnayder, "PMD Projects" şirkətinin CEO-su Nəriman Topçibaşov spiker qismində çıxış ediblər.

İ.Asəliyev qeyd edib ki, Azərbaycanın sement sənayesi təkcə yerli deyil, qlobal səviyyədə də lider sənayelərdən biri hesab oluna bilər: “Bu sənaye yaşıl istehsal prinsiplərinin və beynəlxalq standartların tətbiqinə təkcə bu tədbir ərəfəsində deyil, çox illər əvvəldən başlayıb. Tullantılardan xammal kimi istifadəsinə görə sement sənayesi dünyada birinci yerdədir. Ümumiyyətlə, tullantılardan xammal kimi, eləcə də, alternativ yanacaq kimi istifadə asan görünə bilər, lakin bu proseslər kifayət qədər qəlizdir və bəzən istehsalçılardan əlavə investisiyalar qoymaq tələb edə bilər. Bütün addımları nəzərə alsaq, COP29-da iştirakımız və xəritənin təqdimatı təbiidir.”

T.Giyo "Qlobal Sement və Beton Assosiasiyası" haqda məlumat verərək qeyd edib ki, sement və beton sənayesində dayanıqlı inkişaf təşəbbüslərini dəstəkləmək üçün yaradılan qurumun ilk gündən etibarən, gündəliyində sement sənayesinin xalis sıfır emissiyalarla bağlı proqramları dayanır: “Dayanıqlı inkişaf gündəliyi olan bütün sement və beton şirkətləri assosiasiyanın üzvüdürlər və bu gün də, məhz Azərbaycanın sement sənayesinin üzvlərinin dayanıqlı inkişafla bağlı gündəliyini müzakirə edirik.”

M.Şnayder isə Xalis Sıfır Yol xəritəsinin təqdimatında əhəmiyyətli məqamları vurğulayıb: “Bu xəritədə bütün dəyər zəncirinə baxdıq və emissiyaların bütün dəyər zənciri boyunca azaldılmasını nəzərdə tutmuşuq. Bu gün Azərbaycanın 4 sement istehsalçısının hər birinin müasir zavodu mövcuddur. Bu zavodlarda karbon emissiyalarının 2030-ci ilə qədər azaldılması, 2050-ci ildə xalis sıfır emissiyaya nail olmaq hədəflənir. Bu hədəfə nail olmaq üçün rıçaqlar alternativ yanacaqdan istifadə, klinker faktorunun azaldılması, inşaat dizaynının optimallaşdırılması və innovasiyası, həmçinin karbonun tutulması, utilizasiyası və saxlanılmasıdir”.

"İnşaat materiallarının son istehlakçısı tikinti sektorudur. Biz inşaat materialları istehsalçıları ilə bir neçə gündür ki, emissiyaların azaldılmasını müzakirə edirik. Lakin bu tədbir bir daha göstərir ki, emissiyaların azaldılması bütün son istehlakçılardan, yəni hər birimizdən asılıdır”, - N.Topçibaşov öz çıxışında qeyd edib.

Spikerlərin çıxışlarından sonra panel müzakirələri baş tutub, sement şirkətlərinin CEO-ları assosiasiyanın missiyası ətrafında bir araya gəldiklərindən danışıblar və karbon emissiyalarının azaldılması ilə bağlı sualları cavablandırıblar.