Yuxarı

"Coca-Cola" qiymətlərlə bağlı Azərbaycan hökumətinə müraciət edib

Şirkət bazardakı lider mövqeyini qoruduğunu bildirir

Bakı. 4 avqust. REPORT.AZ/ “Azerbaijan Coca-Cola Bottlers” (ACCB) istehsal etdiyi məhsulların daxili bazarda satış qiymətlərinin artırılması təklifi ilə İqtisadiyyat və Sənaye Nazirliyinin Antiinhisar Siyasəti və İstehlakçıların Hüquqların Müdafiəsi Dövlət Xidmətinə müraciət edib. ACCB-nin baş direktoru Cem Becelin “Report”a verdiyi məlumata əsasən, hazırda şirkətin bununla bağlı təklifləri Dövlət Xidməti tərəfindən araşdırılır, müvafiq hesablamalar aparılır. Prosesin yekununda məsələ ilə bağlı yekun qərar qəbul olunacaq. 

C.Becel qeyd edib ki, bu ilin fevral ayında Azərbaycanda aparılan milli valyutanın devalvasiyası şirkətin məcmu gəlirlərinə mənfi təsir göstərib.

"Şirkətin satışla bağlı statistik göstəriciləri artıq Antiinhisar Xidmətinə təqdim olunub. Dövlət Xidməti hesablamalar apardıqdan sonra şirkətə dəyən zərərin həcmini və mümkün artımın nə qədər ola biləcəyini bildirəcək və qiymət artımının nə qədər olacağı onda müəyyənləşəcək”, - ACCB-nin baş direktoru deyib.

Baş direktor bildirib ki, ölkədə milli valyutanın devalvasiyası prosesi davam edərsə, bu, gələcəkdə şirkətin gəlirlərinə daha böyük mənfi təsir göstərə bilər.

Azərbaycanda rəqib markaların “Coca-Cola”nın satışına təsirindən danışan C.Becel bu məsələlərin satışın həcminə heç bir təsir etmədiyini və şirkətin bazardakı liderliyi qoruduğunu bildirib: “Bazarın 60%-dən çoxunun əhatəsi bir markanın əlindədirsə, digər markalarla rəqabətdə hələ narahat olmağa dəyməz”.

Mətndə orfoqrafik səhv aşkar etdinizsə, səhv olan hissəni qeyd edib Ctrl + Enter düymələrini sıxın.

Xəbər lenti

Bütün xəbərlər


Orphus sistemi