Yuxarı

Azərbaycan Milli Statistika Sisteminin Qlobal Qiymətləndirilməsi başa çatıb

Görüşdə qarşlıqlı maraq doğuran məsələlər ətrafında fikir mübadiləsi aparılıb

Bakı. 9 fevral. REPORT.AZ/ Avropa Statistika Bürosu (Avrostat), BMT-nin Avropa İqtisadi Komissiyası (BMT AİK) və Avropa Azad Ticarət Assosiasiyası (AATA) tərəfindən fevralın 6-9-da Azərbaycan Milli Statistika Sisteminin Qlobal Qiymətləndirilməsinin II mərhələsi keçirilib. 

“Report” xəbər verir ki, qiymətləndirməni həyata keçirən beynəlxalq ekspertlər bu mərhələdə Azərbaycanda kənd təsərrüfatı, sənaye, qiymət, əmək, səhiyyə, həyat keyfiyyəti statistikasının beynəlxalq standartlara uyğunluğu vəziyyətini qiymətləndirməklə yanaşı, Dayanıqlı İnkişaf Məqsədlərinə dair məlumatların əldə edilməsi istiqamətində görülmüş işlərlə tanış olublar, rəsmi statistika məlumatlarının digər istehsalçılarının və biznes cəmiyyətinin nümayəndələri, Dövlət Statistika Komitəsi yanında Statistika Şurasının üzvləri ilə görüşüblər. Regionlarda statistikanın təşkili ilə bağlı görülən işlərlə yerində tanışlıq məqsədilə Qiymətləndirmə Qrupunun üzvləri Şamaxı Rayon Statistika İdarəsinə səfər ediblər.

Məlumata görə, fevralın 9-da Dövlət Statistika Komitəsində Milli Statistika Sisteminin Qlobal Qiymətləndirilməsinin yekunları ilə bağlı görüş keçirilib. Görüşdə Dövlət Statistika Komitəsinin sədri Tahir Budaqov rəsmi statistikanın təkmilləşdirilməsi məqsədilə son dövrlərdə görülmüş işlər haqqında ətraflı məlumat verib.

Qeyd olunub ki, Azərbaycan müvafiq Fərmanlarının icrası olaraq, Dayanıqlı İnkişaf Məqsədlərinə dair, eləcə də milli iqtisadiyyat və iqtisadiyyatın əsas sektorları üzrə strateji yol xəritələrində qarşıya qoyulmuş hədəflərlə bağlı statistik məlumatların işlənilməsi üçün Dövlət Statistika Komitəsi tərəfindən bütün zəruri tədbirlər görülür:

“Bu istiqamətdə həyata keçirilən əsas işlərdən biri də digər dövlət orqanları tərəfindən öz inzibati vəzifələrinin yerinə yetirilməsi məqsədilə toplanan məlumatların və onların inzibati məlumat reyestrlərinin statistik məlumat bazalarına inteqrasiyasıdır”.

T.Budaqov deyib ki, ekspertlərin verdikləri tövsiyələr milli statistika sistemində baş verən institusional dəyişikliklər, inzibati məlumatlardan istifadə, beynəlxalq standartlara uyğun olaraq rəsmi statistik məlumatların istehsalı və yayılması, keyfiyyət aspektləri və spesifik ehtiyacların qiymətləndirilməsi, strateji planlaşdırma üçün mühüm əhəmiyyət daşıyır.

Avropa Statistika Bürosunun Statistik Əməkdaşlıq Bölməsinin rəhbəri Klaudiya Yunker və Qlobal qiymətləndirmə üzrə baş ekspert Gerry O’Hanlon Milli Statistika Sisteminin Qlobal Qiymətləndirilməsinin Dövlət Statistika Komitəsi tərəfindən yüksək səviyyədə təşkil edildiyini diqqətə çatdırıblar. Qiymətləndirmə qrupu milli səviyyədə statistikanın mövcud vəziyyəti və auditin nəticələrinə görə statistikanın gələcək inkişafı ilə bağlı tövsiyələrini veriblər.

Görüşdə qarşlıqlı maraq doğuran məsələlər ətrafında fikir mübadiləsi aparılıb.

Mətndə orfoqrafik səhv aşkar etdinizsə, səhv olan hissəni qeyd edib Ctrl + Enter düymələrini sıxın.

Xəbər lenti

Bütün xəbərlər


Orphus sistemi