Son 2 ildə Azərbaycanda aktiv ƏDV ödəyicilərinin sayı 30 %-dən çox artıb

Azərbaycanda şəffaflaşma indikatorlarından biri də əlavə dəyər vergisi (ƏDV) ödəyicilərinin sayının və ƏDV-yə cəlb olunan dövriyyələrin artımıdır.

"Report" xəbər verir ki, bu barədə İqtisadiyyat Nazirliyi yanında Dövlət Vergi Xidmətinin açıqlamasında bildirilir.

Məlumatda həmçinin deyilir ki, son 2 ildə ölkədə aktiv ƏDV ödəyicilərinin sayı 30 %-dən çox artıb. Digər mühüm indikator malların, işlərin və xidmətlərin təqdim edilməsi zamanı "e-qaimə" ilə rəsmiləşən dövriyyələrin artımıdır.

2021-ci ilin 8 ayında qeyri-neft-qaz sektorunda ƏDV ödəyicilərində "e-qaimə" ilə rəsmiləşən dövriyyələrin həcminin əvvəlki illə müqayisədə 15,4 % artımı qeydə alınıb. Bundan başqa, sentyabrın 1-nə aktiv vergiödəyicilərinin sayı əvvəlki ilin müvafiq dövrü ilə müqayisədə 4,7 %, 2019-cu ilin əvvəli ilə müqayisədə 30 % aktiv obyektlərin (təsərrüfat subyektlərinin) sayı isə müvafiq olaraq 6,1 % və 15,3 % artıb. Qeyri-neft sektoru üzrə daxilolmaların artım tempinin ÜDM-in nominal artımını üstələməsi və "e-qaimə" ilə rəsmiləşən dövriyyələrin xüsusi çəkisinin artması gəlirlərin şəffaflaşması və əqdlərin sənədləşməsi səviyyəsinin yüksəldiyini göstərir. Bu da "kölgə iqtisadiyyatı"nın həcminin azalması və iqtisadiyyatda "ağarma" əlamətlərindən hesab oluna bilər.