“PayPal” “Pinterest”i satın almaq üçün danışıqlar aparır

“PayPal” maliyyə texnologiya şirkətinin “Pinterest” sosial servis və foto hostinqini satın alması üçün danışıqlar aparılır.

“Report” xarici KİV-ə istinadən xəbər verir ki, mənbələrin dediyinə görə, “PayPal” bu sövdələşmə üçün 40-45 milyard dollar ödəməyi nəzərdə tutur. 2019-cu ildən hərraclara çıxarılan “Pinterest”in hazırkı bazar dəyəri 35 milyard dollardır. Danışıqlar barədə məlumat yayıldıqdan sonra “Pinterest”in səhmləri 13 faiz bahalaşıb, “ PayPal”ın isə 5 faiz ucuzlaşıb.

Alqı-satqı baş tutsa, bu, sosial servisin birləşdirilməsi üçün indiyədək ödənilən ən iri vəsait olacaq. 2016-cı ildə “Microsoft” şirkətinin “Linkedin” servisini 26 milyard dollara satın alması hazırda bu baxımdan ən irimiqyaslı sövdələşmədir.