Naxçıvanda pərakəndə ticarət dövriyyəsi 1 %-ə yaxın artıb

Bu ilin yanvar-aprel aylarında Naxçıvan Muxtar Respublikasında pərakəndə ticarət dövriyyəsinin dəyəri 492,5 milyon manat təşkil edib.

Bu barədə "Report"un yerli bürosuna Naxçıvanın Dövlət Statistika Komitəsindən bildirilib.

Məlumata görə, bu, ötən ilin eyni dövrü illə müqayisədə 0,7 % çoxdur.

O cümlədən, muxtar respublikanın ticarət şəbəkəsində 254,1 milyon manatlıq qida məhsulları, içkilər və tütün məmulatları, 238,4 milyon manatlıq qeyri-qida məhsulları satılıb.

Xatırladaq ki, ötən 4 ayda Azərbaycanda pərakəndə ticarət şəbəkəsində istehlakçılara 20 milyard 102,8 milyon manatlıq mal satılıb. Ötən ilin eyni dövrü ilə müqayisədə pərakəndə ticarət dövriyyəsi real ifadədə 3,7 % artıb.