Naxçıvan sahibkarları I rübdə 2 milyon manata yaxın güzəştli kredit alıb

Bu ilin I rübündə Naxçıvan Muxtar Respublikasının İqtisadiyyat Nazirliyi yanında Sahibkarlığın İnkişafı Fondu 163 investisiya layihəsinin maliyyələşdirilməsinə 1,6 milyon manat güzəştli kredit ayırıb.

Bu barədə "Report"un yerli bürosuna Naxçıvanın Nazirlər Kabinetindən bildirilib.

Məlumata görə, bu, ötən ilin eyni dövrü ilə müqayisədə 20,9 % çoxdur.

Verilmiş kreditlər hesabına 71 yeni iş yeri yaradılması nəzərdə tutulur.

Ayrılmış vəsaitlərin 33,6 %-i kənd təsərrüfatı, 48,7 %-i xidmət, 17,7 %-i isə sənaye sektorlarına yönəldilib.

Maliyyələşdirilmiş layihələrin 85 %-, güzəştli kredit məbləğinin isə 47 %-i muxtar respublikanın regionlarında fəaliyyət göstərən sahibkarlıq subyektlərinin payına düşüb.