"Fitch": 2019-cu ildə qlobal avtomobil satışları 4% azalacaq

Bu ildə qlobal avtomobil satışlarının təqribən 3,1 milyon azalacağı gözlənilir.

"Report" xəbər verir ki, bu barədə "Fitch" beynəlxalq reytinq agentliyinin hesabatında bildirilib.

Hesabata əsasən, avtobillər satışları 2017-ci ildə 81,8 milyon, 2018-ci ildə 80,6 milyon ədəd olmuşdusa, bu il göstəricinin 77,5 milyon ədəd olacağı güman edilir. Bu isə ötən ilə nisbətən qlobal avtomobil satışlarının 4% azalacağı deməkdir. Qeyd olunur ki, 3,1 milyon ədəd azalma 2008-ci ildən bəri ən böyük "geriləmədir".

"2018-ci ilin ortalarından bəri qlobal avtomobil bazarında eniş qlobal sənaye istehsalının da azalmasına əsas təsiredici amil oldu. Avtomobil satışındakı vəziyyət may ayında gözlədiyimizdən daha pis oldu", - "Fitch"in baş iqtisadçısı Brayan Koulton deyib.

Bu il dünya bazarına əsas mənfi təsir Çin tərəfdən olacaq. Belə ki, Çində bu ilin yanvar-oktyabr aylarında avtomobil satışı 2018-ci ilin eyni dövrü ilə müqayisədə 11% azalıb. Ümumiyyətlə 2019-cu ilin sonuna qədər Çində satışların 2,1 milyon ədəd azalaraq 21,6 milyon avtomobilə enəcəyi gözlənilir. ABŞ və Qərbi Avropadakı avtomobil bazarları bu il təxminən 2% - müvafiq olaraq 16,9 milyon və 14 milyon ədədə qədər azalacaq.