Dünyanın aparıcı korporasiyalarının mənfəəti birinci rübdə 6% azalıb

Dünyanın aparıcı özəl korporasiyalarının bu ilin birinci rübündə xalis mənfəəti ötən illə müqayisədə 6% azalıb.

“Report” xəbər verir ki, bu barədə Yaponiyanın aparıcı iqtisadi qəzeti Nikkei öz ekspertlərinin hesablamalarına istinadən məlumat yayıb.

Onlar planetin bütün şirkətlərinin ümumi səhm qiymətinin 90%-dən çoxunu təşkil edən təxminən 24,6 min ən böyük özəl korporasiyanın fəaliyyətini öyrəniblər.

Bu şirkətlərin xalis gəliri birinci rübdə 1,11 trilyon dollar təşkil edib ki, bu da bir il əvvəlkindən 6% azdır.

Azalma, əsasən, ABŞ-dan sonra planetin ikinci ən güclü iqtisadi gücü olan Çində biznes şəraitinin pisləşməsi ilə bağlıdır. Belə ki, Çin korporasiyalarının xalis mənfəəti birinci rübdə təxminən 10% azalıb.

Xüsusilə bankların, eləcə də daşınmaz əmlak sektorunda fəaliyyət göstərən şirkətlərin mənfəətinin azalması da nəzərə çarpır. Planetin aparıcı korporasiyalarının gəlirləri ilə bağlı vəziyyət, qəzetin ekspertlərinin hesab etdiyi kimi, bu ilin ikinci rübündə yaxşılaşmaya bilər.