Azərbaycanla Başqırdıstan arasında 2 sənəd imzalanıb

Bu gün Azərbaycanla Rusiyanın Başqırdıstan Respublikası arasında 2 sənəd imzalanıb.

"Report" xəbər verir ki, bu sənədlər Bakıda keçirilən Azərbaycan-Başqırdıstan Biznes Forumda imzalanıb.

Tərəflər 2 əməkdaşlıq haqqında saziş - Azərbaycanın Sərgi Təşkilatçıları Assosiasiyası ilə Başqırdıstanın Sərgi Şirkəti və Azərbaycanın "MT Group" ilə Başqırdıstanın "Başınkom" şirkəti imzalayıb.

İmzalanma mərasimində İxracın və İnvestisiyaların Təşviqi Agentliyinin (AZPROMO) icraçı direktorunun müavini Tural Hacılı qeyd edib ki, bugünkü tədbirin məqsədi Azərbaycanla Başqırdıstan arasında qeyri -neft sektorunun inkişaf etdirilməsidir. Onun sözlərinə görə, bu imzalanan sənədlərin məqsədi iki ölkə arasında əlaqələrin inkişafını təşviq etməkdir.

T.Hacılı vurğulayıb ki, AZPROMO fəaliyyətində Rusiyanın subyektlərinə xüsusi diqqət ayırır, ölkənin müxtəlif regionları ilə birgə işgüzar tədbirlər keçirir, o cümlədən Agentlik tərəfindən mütəmadi olaraq ixrac missiyaları təşkil olunur, Rusiyada keçirilən sərgilərdə yerli sahibkarların iştirakına dəstək göstərilir.

Tədbirdə dövlət rəsmiləri ilə yanaşı, kənd təsərrüfatı, qida sənayesi, əczaçılıq, logistika, konsaltinq, ticarət və digər sahələrdə fəaliyyət göstərən şirkət nümayəndələri iştirak ediblər. Belə ki, tədbirdə Azərbaycanla qarşılıqlı faydalı ticarət və investisiya tərəfdaşlığının potensialı yüksək qiymətləndirilib, ikitərəfli əlaqələrin genişləndirilməsinə dair mövcud perspektivlər qeyd edilib. Forum B2B formatda görüşlərlə davam edib.

2023-cü ildə Azərbaycan ilə Rusiya arasında ticarət dövriyyəsi əvvəlki illə müqayisədə 17,5 % artaraq 4 milyard 358 milyon ABŞ dollarına çatıb, 2023-cü ildə Rusiya Federasiyası ilə ticarət əməliyyatlarının xüsusi çəkisi Azərbaycanın ümumi xarici ticarət dövriyyəsində 8,52 % təşkil edib.

2024-cü ilin yanvar-mart aylarında Azərbaycanla Rusiya arasında ticarət dövriyyəsinin həcmi 890 milyon 732 min ABŞ dolları dəyərində olub, bu, 2023-cü ilin müvafiq dövrü ilə müqayisədə 15,7% azdır.

Rusiyaya ixracın həcmi 2023-cü ilin 3 ayı ilə müqayisədə 12,3 % azalaraq 228 milyon 961 min ABŞ dolları, idxalın dəyəri isə 16,9 % azalaraq 661 milyon 771 min ABŞ dolları təşkil edib.