Azərbaycana tütün idxalı illik 11% artıb

Bakı. 24 iyun. REPORT.AZ/ Tütün və tütün məmulatlarının idxalı illik 10,77% və ya 5 737,66 min ABŞ dolları artaraq cari ilin yanvar-may ayları ərzində 59 001,82 min ABŞ dolları təşkil edib.

"Report" bu barədə Dövlət Gömrük komitəsinə istinadən xəbər verir.

Beləliklə, 2017-ci ilin ilk beş ayının cəmi idxalında tütün və tütün məmulatlarının xüsusi çəkisi 2,09%-ə yüksəlib. Ötən ilin müvafiq dövründə isə bu məhsulların idxalda payı 1,60% olub.

Azərbaycan cari ilin yanvar-may ayları ərzində 166 ölkə ilə 7 266 952 min dollarlıq ticarət əməliyyatı həyata keçirib. Nəticədə ötən ilin eyni dövrü ilə müqayisədə xarici ticarət dövriyyəsinin həcmində illik 13,18% artım qeydə alınıb. İdxal illik 15,44% azalaraq 2 816 868 min dollar, ixrac 44,05% artaraq 4 450 085 min dollar təşkil edib.