Yük və sərnişindaşımanın rahatlaşması ilə bərabər bölgələrdə kənd təsərrüfatı, turizm və sənayenin birbaşa inkişafına səbəb olacaq iri miqyaslı yol infrastrukturu layihələrinin icrası davam etdirilir. Bu cür layihələrdən biri 68 min əhalinin yaşadığı 66 yaşayış məntəqəsini birləşdirən və 46 km uzunluğa malik Quba-Qonaqkənd avtomobil yolunun yenidən qurulmasıdır.
Bu barədə “Report”a "Azərbaycan Avtomobil Yolları" Dövlət Agentliyi (AAYDA) yayıb.
Məlumata görə, Quba-Qonaqkənd avtomobil yolu keçdiyi ərazinin relyefinə uyğun olaraq III və IV texniki dərəcəyə uyğun olaraq yenidən qurulur. Müvafiq olaraq yolun torpaq yatağı 12 və 10 metr, hərəkət hissəsi isə 7 və 6 metr təşkil edir. Avtomobil yolu uzun müddət əsaslı təmir olunmadan istismar olunduğundan yol geyimi və yolun əsası, həmçinin torpaq yatağı sel sularının təsirindən yuyulmuş, hərəkət hissəsində qabarmalar, çalalar əmələ gəlib. Bu səbəbdən də layihə çərçivəsində mövcud örtük sökülərək kənara daşınıb, yararsız qruntun qazılaraq çıxarılması, əvəzinə yararlı material tökülərək kipləşdirilməsi işləri görülüb, bəzi yerlərdə yolun normativ eninin alınması üçün dağ yamaclarının qaya tipli süxurları kəsilərək çıxarılıb və torpaq yatağı genişləndirilərək tələb olunan hündürlüyə qaldırılıb, yatağın yamacları mexaniki üsulla hamarlanıb.Yol boyu su ötürücü boruların quraşdırılması tələb olunduğu üçün 46 ədəd müxtəlif diametrli metal, azbest və dəmir-beton suötürücü borular quraşdırılaraq izolyasiya olunub. Mövcud küvetlər tam dolduğu, həmçinin yolun yuxarı maillik olan hissələrində atmosfer sularının istiqamətləndirilməsi üçün beton küvetlərin tikintisi tələb olunduğu üçün 5 min paqon metr uzunluğunda yeni dəmir-beton küvetlər inşa olunub, avtonəqliyyat vasitələrinin hərəkətinin təhlükəsizliyinin təmin edilməsi məqsədi ilə istinad divarları tiklib. Bundan başqa “İnşaat Norma və Qaydaları”nın tələblərinə əsasən, yol boyunca əsasın tikintisi və asfalt-beton örtüyün salınması işləri aparılıb. Bunun üçün əsasın alt və üst layı müvafiq olaraq 45 və 16 sm hündürlükdə qum qırmadaş və optimal qum-çınqıl qarışığı ilə tikilib. Əlaqələndirici bitum səpilməklə yola iri dənəli asfalt-beton qarışığı döşənib. Hazırda yol boyu xırda dənəli asfalt-beton örtüyünün döşənməsi işləri aparılır ki, bu işlər də artıq bitmək üzrədir.
![](https://static.report.az/photo/c57f28cf-4149-3c5f-98b8-0b02b4b586c4.jpg)
Layihə çərçivəsində yolun 35, 36 və 41-ci km-lik hissəsində kiçik dağ çayları üzərində hər birinin uzunluğu 26 və 27 metr olan 1 aşırımlı 3 körpü, yolun 43 və 46-cı km-lik hissəsində Babaçay və Cimiçay üzərində yeni körpülər inşa edilib. Babaçay üzərindən salınan körpünün uzunluğu 126 metr, Cimiçay üzərindəki körpünün uzunluğu isə 80 metrdir. Hər iki körpünün ətrafında müvafiq olaraq 280 və 160 metr uzunluğunda su nizamlayıcı və sahil bərkidici dəmir-beton istinad divarları tikilib.
Bundan başqa avtomobil yolunun Təngəaltı kəndi ərazisində, sıldırım qayalıqlar arasından keçən hissəsinin genişləndirilməsi işləri aparılaraq yekunlaşdırılır. Bundan başqa ərazidə 150 metr uzunluğunda dəmir-beton konstruksiyalı bəndin qurulması işləri də bitmək üzrədir. “Təngə dərəsi” kimi tanınan ərazidə, Vəlvələçayın kənarında qurulan bəndin hündürlüyü 12 metrdir. Yolun genişləndirilməsi işləri Quba-Qonaqkənd yolunun 29-30-cu kilometrlik hissəsini əhatə edir. Çayda bənd vurulması və qayaların çapılması hesabına yolun hərəkət hissəsinin 4-5 metrdən 7-12 metrə kimi genişləndirilib.
![](https://static.report.az/photo/42fef756-9948-3bc3-9713-2cb15462dfd6.jpg)
Quba rayonunun Amsar, Nügədi, Püstəqasım, Qam-qam, Təngəaltı və başqa yaşayış məntəqələrini əhatə edən layihənin sonuncu mərhələsində avtonəqliyyat vasitələrinin normal hərəkətinin təşkili üçün yollar boyu yol nişanları quraşdırılacaq, yolcizgi və yolgöstərici xətlər, həmçinin piyada zolaqları çəkilməklə müasir yol infrastrukturu yaradılıb vətəndaşların istifadəsinə veriləcək.
Sözügedən yolun yenidən qurulması yol boyu yaşayan əhalinin gediş-gəlişini asanlaşdırmaqla yanaşı, həm də onların tədarük etdikləri kənd təsərrüfatı məhsullarını və meyvə-tərəvəzi qısa vaxtda istədikləri ünvanlara çatdırmağa imkan yaradacaq, rayonun turizm imkanlarını genişləndirəcək.
![](https://static.report.az/photo/0a223fbc-0552-32bd-a527-923d59d6bbcb_300.jpg)
![](https://static.report.az/photo/42fef756-9948-3bc3-9713-2cb15462dfd6_300.jpg)
![](https://static.report.az/photo/2ef617e9-cb43-3d9d-8776-2dbb6d0f14c2_300.jpg)
![](https://static.report.az/photo/62323789-2b24-3384-98ac-ef4baf26edc1_300.jpg)
![](https://static.report.az/photo/eccec34c-5e10-3121-88e2-9fe89cb0a32e_300.jpg)
![](https://static.report.az/photo/32ce6edf-9ff7-3a20-a3d9-49174d09cff2_300.jpg)
![](https://static.report.az/photo/cd791fdc-ac1c-389e-94d8-340f312437cd_300.jpg)
![](https://static.report.az/photo/2171bed2-7795-309d-be39-2ff68f190a5b_300.jpg)
![](https://static.report.az/photo/c2e00e67-e425-3512-9cc3-06dbcb9b7b89_300.jpg)
![](https://static.report.az/photo/d7b8ce98-c27c-3606-90f0-99c30dc5d918_300.jpg)
![](https://static.report.az/photo/c9bbf039-d6d9-36c5-8e23-9b93ef4a0346_300.jpg)
![](https://static.report.az/photo/6234e85f-72df-3b5d-b093-aa7e627c2bc4_300.jpg)
![](https://static.report.az/photo/c57f28cf-4149-3c5f-98b8-0b02b4b586c4_300.jpg)
![](https://static.report.az/photo/90068389-f725-3e23-b804-cf8e86524e36_300.jpg)