Derlis Meza Kolli: "Hər iki cəbhədə sonadək mübarizə aparacağıq"

Bakı. 9 mart. REPORT.AZ/ "Neftçi"nin futbolçusu Derlis Meza Kolli evdə "Keşlə"ni 3:2 hesabı ilə yendikləri Topaz Premyer Liqasının XIX tur matçından sonra brifinq keçirib.

"Report" xəbər verir ki, paraqvaylı yarımmüdafiəçi əvvəlcə oyunu dəyərləndirib...

İlk dəqiqələrdən sonadək gözəl oyun nümayiş etdirdik. Qələbəyə köklənmişdik. Hər iki hissədə qollar vuraraq, komandamızı irəli çıxara bildik. Güclü rəqibə qarşı oynayırdıq. Sevinirəm ki, qələbə qazandıq.

"Keşlə"də çıxış edən qardaşın Sezar Meza Kolliyə qarşı sanki ehtiyatla oynayırdın...

- Bu, qardaşım olduğu üçün deyildi. Sadəcə, "Keşlə"nin təhlükəli və ən yaxşı futbolçularından biri elə Sezar idi. Özüm onunla ehtiyatlı oynayıram, çünki hər an məni aldadıb keçə bilər. Çox sürətli oyunçudur. Neçə ildir qardaşımla birgə futboldayıq. Əksərən eyni komandada oynamışıq. Bu gün isə ona qarşı oynamaq mənim üçün anlada biləcəyim hiss deyil. Sezara gələcək oyunlarında uğurlar arzulayıram.

"Neftçi" çətinliklə qollar vursa da, asanlıqla buraxırdı. Bu, nə ilə bağlı idi?

- Oyunun gedişində rəqibin bütün hücumlarının qarşısını kəsə bilirdik. Oyundan əvvəl də baş məşqçimiz bizə təlimat verəndə vurğulamışdı ki, rəqib ən çox standart vəziyyətlərdən təhlükə yaradır. Ona görə də "Keşlə"nin futbolçularını sıx tutmağımızı, bağlamağımızı istəmişdi. Lakin standart vəziyyətlərdə çatışmazlıqlarımız oldu və rəqib də bunlardan yararlanaraq, qollar vurdu.

Oyundan əvvəl qardaşınla "Kim udar, kim uduzar" deyə bəhsə girməmişdin?

- Onunla oyun haqda danışmamışıq. Sadəcə, o da, mən də komandamıza fayda verməyə çalışırıq. Günün böyük hissəsini birgə keçirir, hər yerə birgə gedirik. Yenə birgə olanda bu oyun barədə danışacağıq.

Komandanızın avrokubok şansları Premyer Liqa, yoxsa ölkə kuboku vasitəsilə daha çoxdur?

- Deməzdim ki, hansısa yol asan görünə bilər. Çünki hər iki istiqamətdə çətinliklər var. Rəqiblər də asan deyillər. Ona görə də neçə vaxtdır öz üzərimizdə işləyirik. İşimizin bəhrəsini qələbələrlə görürük. İnanıram ki, növbəti oyunlarda da sərfəli nəticə əldə etmək üçün əlimizdən gələni edəcəyik. Hər iki cəbhədə sonadək mübarizə aparacağıq. Nə alınarsa, alınar.

Bu oyunun qəhrəmanı olaraq, kimi görürsünüz?

- Oyunun qəhrəmanı kapitanımız Ruslan Abışovdur. Amma doğulandan bu günədək oyunlarda tək qəhrəman bir nəfərdir. Bu da Messidir.