Azərbaycan millisi ilə oyun üçün Qazaxıstan yığmasına 5 legioner futbolçu cəlb olunacaq

Bakı. 18 aprel. REPORT.AZ/ İyunun 4-də Azərbaycanın 21 yaşadək futbolçulardan ibarət milli komandası ilə yoldaşlıq görüşü keçirəcək Qazaxıstan yığmasına legioner oyunçular da cəlb olunacaq.

“Report”un məlumatına görə, bu barədə Qazaxıstanın gənclərdən ibarət komandasının böyük məşqçisi Talqat Baysufinov sports.kz saytına açıqlamasında bildirib. 

O, yığmaya namizədləri gözdən keçirdiklərini söyləyib: “Gənclər yığmasının təlim-məşq toplanışı FİFA-nın təyin etdiyi tarixdə, iyunun 2-10-da olacaq. Hazırlıq dönəmi üçün iki yoldaşlıq matçı planlaşdırılıb. İlk oyunumuzu iyunun 4-də Azərbaycanın 21 yaşadək futbolçulardan ibarət yığmasına qarşı keçirəcəyik. İkinci qarşılaşma üçün rəqibin tapılması üçün danışıqlar gedir. Ola bilər ki, ikinci rəqib Qazaxıstan Premyer Liqasında çıxış edən legionerlərdən ibarət yığma və ya həmin vaxt Astanada toplanış keçəcək yerli klublardan biri olsun. Xarici çempionatlarda çıxış edən 5 futbolçu baxışa dəvət olunacaq. Dörd namizəd Belarusun birinci liqasında, bir nəfər isə Belçikanın II Divizion klubunda çıxış edir. Yığmanın seleksiya işi Qazaxıstanda da aparılır. Davamlı olaraq Premyer Liqa, I və II liqaların matçlarına baxırıq. Namizədlər var və onların adları bir müddət sonra açıqlanacaq”.

Qeyd edək ki, iyunun 4-də Astanada keçiriləcək oyun Bakı vaxtı ilə saat 13:00-da başlayacaq.