​Azərbaycan güləşçiləri Avropa Oyunlarına iranlı pəhləvanlarla birgə hazırlaşır

Bakı. 26 may. REPORT.AZ/ Sərbəst güləş üzrə Azərbaycan yığma komandası "Bakı 2015" I Avropa Oyunlarına iranlı pəhləvanlarla birgə hazırlaşır. "Report"un Azərbaycan Güləş Federasiyasının rəsmi saytına isitnadən verdiyi məlumata görə, Olimpiya Güləş Mərkəzində keçirilən təlim-məşq toplanışına ümumilikdə 30-a yaxın güləşçi qatılıb.

İran pəhləvanları arasında qitə və dünya çempionatlarının qalib və mükafatçıları ilə yanaşı, üçqat Asiya çempionu Reza Afzali Paemami də var. Mayın 18-dən start götürən toplanış baş məşqçi Saypulla Absaidov, böyük məşqçi Firdovsi Umudov və məşqçi David Kurtsiyanın rəhbərliyi altında iyunun 2-dək davam edəcək. Bu təlim-məşq toplanışı həm də Avropa Oyunlarında iştirak edəcək heyətin müəyyənləşdirilməsində həlledici rol oynayacaq.

Qeyd edək ki, "Bakı 2015" I Avropa Oyunlarında güləş yarışları 13 - 18 iyunda Heydər Əliyev adına İdman Sarayında baş tutacaq. Hər üç güləş növü üzrə yarışlarda ümumilikdə 24 çəki dərəcəsində qaliblər müəyyənləşəcək.