Avropa Oyunları bayrağının Polşaya ötürülmə mərasimi olmayacaq

Bu gün keçiriləcək "Minsk 2019" II Avropa Oyunlarının bağlanış mərasimində bayrağın növbəti Oyunların ev sahibi Polşanın Krakov şəhərinə ötürülmə mərasimi olmayacaq.

"Report"un Belarus paytaxtına ezam olunmuş əməkdaşı xəbər verir ki, bunu "Minsk 2019"un Əməliyyat Komitəsinin Mərasimlər və Mədəni Proqram üzrə İdarəsinin rəisi Sergey Xomiç keçirdiyi mətbuat konfransında deyib.

Onun sözlərinə görə, tədbir zamanı Avropa Oyunlarının bayrağı sadəcə endiriləcək. Xomiç bağlanış zamanı müasir Belarusun planının nümayiş etdiriləcəyini də əlavə edib.

Mətbuat konfransında mərasimə hazırlıq üzərində 500-dək şəxsin çalışdığı da vurğulanıb.

Bağlanış mərasimi Bakı vaxtı ilə saat 21:00-da başlanacaq.