Mirzə Əliyev: “Lisenziyası ləğv edilmiş banklardakı vəsaitlərimizi götürə bilsək, gələn il daha 10 mln. manat güzəştli kredit verəcəyik”

Bakı. 13 dekabr. REPORT.AZ/ Gələn il Kənd Təsərrüfatı Nazirliyi yanında Kənd Təsərrüfatı Layihələri və Kreditlərinin İdarə Edilməsi üzrə Dövlət Xidmətinin xətti ilə fermerlərə 10 mln. manat güzəştli kredit ayrılması nəzərdə tutulub.

“Report” xəbər verir ki, bu barədə jurnalistlərə açıqlamasında qurumun rəisi Mirzə Əliyev bildirib.

“Bu ilin may ayından kreditləşməni bərpa etmişik. Söz vermişdik ki, ilin sonuna qədər 10 mln. manat vəsaitin fermerlərə çatdırılmasına çalışacağıq. Demək olar ki, bu rəqəmə çatmışıq. 2019-cu ildə kreditlərin geri yığımını sürətləndirə və lisenziyası ləğv edilmiş banklardakı vəsaitlərimizi götürə bilsək, daha 10 mln. manat güzəştli kredit verəcəyik”, - o qeyd edib.