"Ərzaq məhsullarının tədarükü və təchizatı” ASC bu il dövlət təşkilatlarına 24 mln. manatlıq mal satıb

Bakı. 5 aprel. REPORT.AZ/ Bu ilin I rübündə "Ərzaq məhsullarının tədarükü və təchizatı” ASC dövlət satınalan təşkilatlarının ərzaq məhsullarına olan təlabatının ödənilməsi üçün 24,49 mln. manatlıq qida və kənd təsərrüfatı məhsulları tədarük edərək satışını həyata keçirib. 

Bunu "Report"un sorğusuna cavab olaraq qurumdan deyiblər. 

Məlumata görə, bunlar, əsasən, un, ət və meyvə-tərəvəz məhsullarıdır. 2018-ci ilin yekununda Səhmdar Cəmiyyətinin alqı-satqı göstəricisini 118 mln. manata çatdırması proqnozlaşdırılır. 

3 ay ərzində qurum daxili tələbatın ödənilməsi ilə yanaşı, ixracla da məşğul olub və xaricə 3,53 mln. manatlıq məhsul tədarük edərək satıb. Bunlar, əsasən, meyvə-tərəvəz məhsulları olub.