Assosiasiya sədri: "Nar ixracı üçün “Global Gap”ın subsidiyalaşdırması məqsədəuyğundur"

“Global Gap” sertifikatının əldə edilməsi Azərbaycan nar istehsalçıları üçün yüksək xərclər tələb etdiyi üçün, bu rüsumun dövlət tərəfindən subsidiyalaşdırılması daha məqsədəuyğun olardı.

Bu fikri “Report”a açıqlamasında “Azərbaycan Nar İstehsalçıları və İxracatçıları Assosiasiyası” İctimai Birliyinin İdarə Heyətinin sədri Fərhad Qaraşov bildirib.

Onun sözlərinə görə, Azərbaycan narının əsas ixrac istiqamətləri Rusiya və, Rusiya-Ukrayna müharibəsindən əvvəl, Ukrayna olub: “Müxtəlif illərdə bəzi Avropa və Fars Körfəzi ölkələrinə də ixrac həyata keçirilib, lakin bu, genişmiqyaslı olmayıb. Hazırda ixrac coğrafiyasının Avropa ölkələrinə genişləndirilməsi planlaşdırılır. Lakin ixrac prosesində “Global Gap” sertifikatının tələb olunduğunu və bu sertifikatın fermerlər üçün ciddi maliyyə yükü olduğunu nəzərə alaraq, dövlət tərəfindən subsidiyaların ayrılması daha məqsədəuyğun görünür”.

F.Qaraşov əlavə edib ki, Küveytli sahibkarlar Azərbaycana bir neçə dəfə səfər edərək narın ixracında maraqlı olduqlarını bildiriblər. “Son dövrlərdə baş verən münaqişələr, xüsusən də İran, İsrail və Fələstin ətrafında vəziyyət, logistika sahəsində bəzi çətinliklər və risklər yaradıb. Buna baxmayaraq, Assosiasiya Azərbaycan narının ixracını genişləndirmək üçün davamlı danışıqlar aparır,” - deyə o vurğulayıb.