Bakı. 27 noyabr. REPORT.AZ/ Naxçıvan Muxtar Respublikasında payız iməcilikləri dövründə əkinçilik üçün əlverişli olmayan torpaq sahələrində yeni meyvə bağlarının salınması diqqət mərkəzində saxlanılır.
"Report" muxtar respublikanın Ali Məclisinin mətbuat xidmətinə istinadən xəbər verir ki, Naxçıvanda keçirilən növbəti iməcilikdə yerli meyvə sortlarından ibarət meyvə bağları salınıb.
Muxtar respublikanın Ali Məclisinin, Nazirlər Kabinetinin, Ekologiya və Təbii Sərvətlər Nazirliyinin və Kəngərli Rayon İcra Hakimiyyətinin kollektivləri Naxçıvan-Sədərək avtomobil yolunun kənarında keçirilən iməcilikdə iştirak ediblər. İməcilik iştirakçıları 4 hektar ərazidə 2100 ədəd badam və digər meyvə tingləri əkib, müvafiq aqrotexniki tədbirlər və suvarma işləri görüblər.
Ali Məclisin sədri Vasif Talıbov iməcilikdə iştirak edib, yeni tinglər əkib. Həmin gün muxtar respublika ərazisində keçirilən iməciliklərdə 5560 meyvə tingi, 7660 üzüm və 4300 gül kolu əkilib, ümumilikdə 10 hektardan artıq sahədə yeni meyvə və 4 hektar sahədə üzüm bağları salınıb.