Xəzər dənizinin dayazlaşması həm ekologiyaya, həm də region ölkələrinin iqtisadiyyatına və siyasətinə mənfi təsir göstərir.
"Report" xəbər verir ki, bunu politoloq İlqar Vəlizadə Azərbaycan-Qazaxıstan Ekspert Şurasının IV iclası çərçivəsində bildirib.
"Xəzər regionu Avrasiya siyasətinin mərkəzlərindən birinə çevrilir. Buna görə də Xəzər regionunda təhlükəsizliklə bağlı məsələlər həm Azərbaycana, həm də Qazaxıstana toxunur", - o bildirib.
İ.Vəlizadə bildirib ki, son 15 ildə Xəzər dənizinin sahəsi 20 min kvadrat kilometr azalıb.
O vurğulayıb ki, Xəzər dənizinin qorunması məsələsində həll yollarının tapılması üçün Qazaxıstan və Azərbaycan arasında qarşılıqlı əlaqələrin gücləndirilməsi vacibdir: "İqtisadiyyat və siyasət də daxil olmaqla müxtəlif sahələrdə əməkdaşlıq regionda baş verənləri daha yaxşı anlamağa imkan verir".