Gələcək illərdə iqlim ssenarilərindən asılı olaraq Xəzər dənizinin səviyyəsinin 8-10 metr düşməsi proqnozlaşdırılır.
"Report" xəbər verir ki, bunu Ekologiya və Təbii Sərvətlər Nazirliyinin Ekoloji siyasət şöbəsinin müdir müavini Rafiq Verdiyev ADA Universitetində "Su və gender bərabərliyi" mövzusunda keçirilən konfransda deyib.
O qeyd edib ki, burada insan amili ilə yanaşı iqlim dəyişikliyinin təsirləri var: "Hazırda Azərbaycan COP29-a qədər iqlim dəyişikliyinə uyğunlaşma və milli adaptasiya proqramı üzərində çalışır. Bu proqram çərçivəsində gələcəkdə iqlim dəyişikliyi səbəbindən su resurslarının azalmasının qarşısının alınması, su ehtiyatlarından səmərəli istifadə, bütün sahələrdə su təminatının yaxşılaşdırılmasına yönələn adaptasiya tədbirləri nəzərdə tutulub".